Byggðu draumahúsið rétt utan við borgina

Fyrir þremur árum fóru þau Hafsteinn Helgi Halldórsson og Guðrún Agla Egilsdóttir í bíltúr upp að Hafravatni og hugsuðu með sér að þarna væri yndislegt að eignast lóð. Draumurinn rættist og eftir mikla vinnu er fjölskyldan flutt inn í draumahúsið við Hafravatnsveg. Ljósmyndarinn Kári Björn Þorleifsson myndaði húsið fyrir fjölskylduna og fangaði einstakt heimili Hafsteins og Öglu.

„Ég var mikið heima hjá vinum mínum sem allir eru með einhverfu í tíu ár og fór í göngutúra og bíltúra um þetta svæði og lét mig lengi vel dreyma um lóð á þessum stað. Svo þegar maður var að gera rétta hluti í lífinu og búinn að taka til hjá sjálfum sér þá fórum við Agla í bíltúr þangað og létum okkur dreyma. Ég hugsaði með sjálfum mér þennan sama dag hversu vel maður myndi hugsa um lóð ef maður fengi lóð þarna, án þess að ætlast til neins. Svo held ég að það hafi bara verið þetta sama kvöld sem við fórum á fasteignavefinn og þar var þessi lóð,“ segir Hafsteinn og lýsir húsinu sem einhverju sem átti bara að verða. „Það er reyndar gaman að segja frá því að á okkar fyrsta stefnumóti fórum við samað að Hafravatni í ísbíltúr,“ bætir Hafsteinn við. 

Hafsteinn og Agla sem reka saman hönnunarfyrirtækið Happie Furniture höfðu verið á leigumarkaði áður en þau réðust í framkvæmdirnar. „Við kaupum lóðina bara og ætlum að bíða og sjá, en svo förum við að reikna og teikna og sjá að þetta er ekkert vitlaus hugmynd. Miklu gáfulegra að byggja ef þú ert með lóð og þú hefur einhvern stað til að vera á í stað þess að leigja. Það er alveg himinn og haf þar á milli, það er ekkert hægt að bera það saman,“ segir Hafsteinn. 

Lóðin sjálf kostaði ekki mikið meira en bíll en gamalt deiliskipulag fylgdi henni. Áður en þau keyptu lóðina fengu þau Hafsteinn og Agla deiliskipulaginu breytt í samræmi við nýtt aðalskipulag og gátu því byggt 130 fermetra fjölskylduhús í stað 50 fermetra. Töluverður kostnaður fylgdi lóðinni þó svo hún hafi sjálf ekki verið það dýr en þau þurftu sjálf að sjá um að gera veg upp að húsinu, bora eftir vatni, leggja rotþró. Þar sem húsið er á þessu svæði þurfa þau Hafsteinn og Agla líka að sjá sjálf um snjómokstur og fara með ruslið. Fyrir vikið segir Hafsteinn þau bara vera meðvitaðri um hvað þau kaupa og henda auk þess sem þau borða plöntufæði sem rotnar fljótt niður í moltuhaug. Nágrannar þeirra fuglarnir eru hæstánægðir með það.

Hafsteinn og Agla fengu Kjartan Árnason hjá arkitektastofunni Glámu Kím til að hanna fyrir sig húsið og hrósar Hafsteinn honum sérstaklega fyrir hönnun hans. „Við ætluðum fyrst að hanna hús frá grunni og fljúgum til Ísafjarðar til að hitta Kjartan sem býr í sams konar húsi og þessu húsi sem hann teiknaði bara fyrir sig og fjölskyldu sína. Við urðum ástfangin af því húsi, hvernig flæðið er inni í því, hvað allir eru saman, það er hægt að tala saman milli hæða en ef einhver vill fá frið þá er hægt að loka dyrum. Upplifunin í húsinu er ótrúleg og ég lærði rosalega mikð á þesss að það er það sem arkitektúr snýst um, Agla hafði nefnt það við mig, hún var í Listaháskólanum í arkitektúr áður en þetta allt fór í gang,“ segir Hafsteinn og telur það mýtu að arkitektúr snúist aðallega um sjónrænu hliðina.  

Á meðan Hafsteinn sá um að allt gengi upp í framkvæmdunum sá Agla að mestu leyti um hönnunina innandyra þar sem hún hugði vel að hverju smáatriði og lét til dæmis sérblanda fyrir sig málningu „Litirnir í húsinu eru einhverjir uppáhaldslitir af himninum á einhverjum ákveðnum tíma. Hún las 200 blaðsíðna bók á klukkutíma um liti á aðfangadagskvöld sem hún fékk í jólagjöf,“ segir Hafsteinn og segir þau Öglu virka vel saman. Hann sjái um að gera og hún hafi skoðun á fagurfræðinni og segir að ef hann byggi þarna einn væru bara pizzukassar og hvítir veggir. Húsgögnin koma síðan að mestu leyti frá Happie Furniture, sem er þeirra eigin hönnun og framleiðsla.

Sagan af húsi þeirra Hafsteins og Öglu kann að hljóma eins og fjarlægur draumur í eyrum margra en Hafsteinn segir alla geta gert það sama og þau. „Ég er rosalega hrifinn af því að fólk trúi á sjálfan sig. Ef einhver getur það þá getur þú það líka. Eins og að byggja sér hús. Það þarf ekki að vera verktaki til þess að gera svona hluti. Ef fólk er með einhverja svona drauma þá endilega gera það hvort sem það er við borgarmörkin eða einhvers staðar lengra frá,“ segir Hafsteinn og segir það yndislegt að búa í náttúrunni, refir, uglur og farfuglar eru nágrannar þeirra. Hann er auk þess fljótari á verkstæði sitt í Kópavogi frá Hafravatnsveginum en úr Vesturbænum þar sem þau bjuggu áður.

Þó svo að Hafsteinn og Agla hafi byggt sitt eigið gerðu þau það ekki ein og óstudd. Þau fengu góða hjálp frá fjölskyldu, vinum og fólki sem vildi þeim vel. „Við erum ótrúlega þakklát fyrir alla hjálpina. Þetta var ótrúlega skemmtilegt púsluspil. Það var mikil gleði í kringum þetta, engin slasaði sig og það eiga allir góða minningu sem skilar sér í andanum í húsinu. Það er það sama og við leggjum upp með í fyrirtækinu.“