Smartland Mörtu Maríu | Heimili og hönnun | mbl | 9.6.2022 | 17:15 | Uppfært 11.6.2022 2:26

Litið inn í eitt glæsilegasta hús landsins

Öldugata 16 er eign sem marga dreymir um. mbl.is/Croisette Home

Glæsihúsið Öldugata 16 í Reykjavík er auglýst til sölu á vef Croisette Home á Íslandi. Húsið stendur á einum besta stað í gamla Vesturbænum og segir Styrmir Bjartur Karlsson framkvæmdastjóri sem er með það í einkasölu að svona hús komi einungis einu sinni á hverjum áratug í sölu. Hann telur þetta tækifæri fyrir þá sem vilja búa miðsvæðis á heimili með miklum karakter.

Öldugata 16 er á þremur hæðum og með 13 herbergjum og er alls 317,6 fermetrar að stærð samkvæmt Þjóðskrá Íslands. Húsið stendur á stórri hornlóð við Öldugötu og Ægisgötu. Það er steinað að utan með Hrafntinnu og Silfurbergi sem gefur því einstakt útlit. Í húsinu er íbúð í kjallaranum.

Croisette.Home kynnir í einkasölu Öldugötu 16. mbl.is/Croisette Home

Öldugata 16 er að mestu upprunaleg. Á aðalhæð er komið inn í marmaralagt og viðarklætt anddyri sem er með skáp úr mahony viði. Sá viður er ríkjandi í klæðningum og innréttingum hússins.

Komið er inn á marmaralagt og viðarklætt anddyri. mbl.is/Croisette Home

Sérsmíðaður skápur úr mahony viði. mbl.is/Croisette Home

Úr anddyri er gengið inn í stofu en fyrst er bókastofa, dagstofa er þar við hliðina og loks stór og falleg borðstofa. Gegnheilt eikarparket með fiskibeinamynstri er á borðstofu og bókastofa er með stjörnulaga mynstri í parketinu. Dagstofan er teppalögð ljósu teppi. Á milli stofanna eru rennihurðir ísettar slípuðu gleri í litlum frönskum gluggum. Aukin lofthæð er á hæðinni.

Dagstofan er teppalögð ljósu teppi. mbl.is/Croisette Home

Innaf borðstofu er eldhús með eldri innréttingu og lítið búr eða köld geymsla er þar við hliðina. Útgengt er í garð úr eldhúsinu.

Það er margt upprunalegt í húsinu. mbl.is/Croisette Home

Á annarri hæð eru tvö svefnherbergi, lokuð af með hurðum ísettum litlum frönskum gluggum. Úr gangi er útgengt út á svalir þaðan sem útsýni er mikið yfir miðborgina og Vesturbæinn.

Stiginn upp á aðra hæð þar sem finna má tvö svefnherbergi. mbl.is/Croisette Home

Þetta baðherbergi má finna innan af öðru herberginu á annarri hæð hússins. mbl.is/Croisette Home

Íbúðin í kjallaranum er með sérinngangi. Hún er þriggja herbergja og í dag skipulögð þannig að hún er með tveimur herbergjum og stofu.

Garður hússins er sannkallað listaverk þar sem mosavaxnir steinar umlykja blómabeð og tré. Í fullum sumarskrúða er þetta einn af fallegri görðum þessa gamalgróna hverfis.

Af fasteignavef mbl.is: Öldugata 16