Við bæjarmörk Reykjavíkur og Seltjarnarness er að finna skemmtilega 116 fm íbúð við Seilugranda. Íbúðin er staðsett á efstu hæð í fjölbýlishúsi sem byggt var árið 1981, en hún hefur verið innréttuð á glæsilegan máta og er búin afar fallegum húsmunum. 

Í íbúðinni er tímalaus og klassísk hönnun í forgrunni. Gengið er inn í forstofu sem hefur verið máluð að hluta í hlýlegum bleikum lit, en fallegur jólakrans á útidyrahurðinni vekur án efa athygli og býr til notalega hátíðarstemningu. Þá koma glöggir hönnunarunnendur eflaust auga á Wiener-stólinn eftir hönnuðinn Gebrüder Thonet.

Stofan er björt og rúmgóð með útsýni til suðurs og vesturs. Þar má sjá hinar klassísku hillur frá String sem voru hannaðar af sænska arkitektinum Nils Strinning. Þá einnig sjá fallegt svart veggljós frá Flos hannað af Paolo Rizzatto sem setur skemmtilegan karakter á rýmið. 

Borðstofan státar einnig af fallegri hönnun, en þar má sjá tímalausa PH5-ljósið og úrval af hönnunarstólum á heimsmælikvarða, þar á meðal Sjöuna eftir Arne Jacobsen, Y-stólinn eftir Hans J. Wegner og Cesca-stólinn eftir Marcel Breuer. 

Eldhúsið er stílhreint og minimalískt með fallegri innréttingu með sérsmíðuðum framhliðum úr ljósum við og svartri borðplötu. 

Af fasteignavef mbl.is: Seilugrandi 2