Fólk sækir í auknum mæli í að komast út fyrir skarkala borgarinnar. Það er þess vegna sem 127 fm raðhús við Lóuhlíð í Grindavík er góð hugmynd. Húsið er fjögurra herbergja og var byggt í fyrra. Aðalsteinn Snorrason arkitekt hannaði raðhúsið sem mætir flestum nútímakröfum.
Eldhús og stofa er til dæmis í sameiginlegu rými með veglegri eyju. Sprautulakkaðar innréttingar prýða eldhúsið og eru þær sérhannaðar inn í húsið. Innréttingarnar eru sprautulakkaðar í litnum melamine sem er ljósgrár litur. Á borðplötunum er Kvartsteinn sem er slitsterkur og smart og fer vel við innréttinguna.
Í eldhúsinu og stofunni er hátt til lofts og sérlega bjart.
Á baðherberginu eru einnig sérsmíðaðar innréttingar sem fara vel við sandlitaðar flísar. Þar er stór spegill með innbyggðri lýsingu og sturta.