Maja Hlín Sigurðardóttir, eða Maja í Auganu eins og hún er oftast kölluð, hefur sett glæsilega íbúð sína á sölu. Íbúðin er við Naustabryggju í Reykjavík. Hún er 86 fm að stærð og var húsið sjálft byggt 2005.
Maja er mikil smekkkona eins og sést á heimili hennar. Í stofunni er að finna fallegan leðursófa, Eames-hægindastólinn og svo setur stórt verk eftir Kristinn Pálmason svip sinn á heimilið. Eldhús og stofa flæða saman í eitt og er hvít innréttingin með sprautulökkuðum hurðum þar í aðalhlutverki.
Á svölunum er útisófi, borð og stólar, hitalampi og plöntur í pottum sem gera þær vistlegri.