Í Vedbæk í Danmörku er að finna tignarlega 1.000 fm hönnunarvillu. Eignin stendur á 7.000 fm lóð með snyrtilegri verönd og upphitaðri sundlaug. Eignin býr yfir miklum sjarma og hefur merka sögu, en hún ætti að falla vel í kramið hjá arkitektúrs- og hönnunarunnendum.

Eignin var reist árið 1918 og ber þess skýr merki þrátt fyrir að hafa fengið allsherjar yfirhalningu árið 2014, þá 96 árum eftir að eignin var byggð. Byggingarstíllinn og skipulagið er í anda þess tíma, en rósettur og vegglistar gefa eigninni notalegan blæ í bland við nýlegri hönnunarhúsgögn. 

Mjúk litapalletta einkennir eignina þar sem formfögur húsgögn eru í forgrunni. Stórir og fallegir gluggar hleypa mikilli birtu inn og aukin lofthæð gefur eigninni mikinn glæsibrag. Þá gefa viðarbitar í lofti einstakan karakter og tóna fallega við ljósa veggina.

Útsýnið setur punktinn yfir i-ið

Eldhúsið, sem er staðsett í rúmgóðu og opnu rými, er án efa nútímalegt en þó afar stílhreint og fellur því vel að stíl eignarinnar. Samliggjandi er borðstofa og stofa, en þar má meðal annars sjá hvítan flygil og grænar plöntur.

Glæsilegt útsýni frá villunni setur punktinn svo yfir i-ið, en þaðan er einstakt sjávarútsýni yfir Eyrarsund til Svíþjóðar. Villuna er hægt að leigja á Airbnb, en hún státar af fimm svefnherbergjum og fimm baðherbergjum. Þar rúmast allt að 12 gestir hverju sinni, en nóttin yfir sumartímann kostar 2.535 bandaríkjadali, eða sem nemur rúmum 346 þúsund krónum.