Smartland Mörtu Maríu | Heimili og hönnun | mbl | 17.5.2023 | 17:00

Minimalísk hönnun í 227 fm parhúsi í Urriðaholti

Þessi fallega eign státar af fjórum svefnherbergjum og þremur baðherbergjum, en hún er staðsett í botlanga við Mosagötu 18. Samsett mynd

Við Mosagötu í Urriðaholti er að finna fallegt 227 fm parhús á tveimur hæðum sem reist var árið 2018. Húsið hefur verið innréttað á einstaklega sjarmerandi máta þar sem minimalískur stíll er í forgrunni.

Frá forstofu er gengið inn í bjart og rúmgott alrými á efri hæð. Falleg litapalletta flæðir í gegnum rýmið, en þar eru náttúrulegir tónar áberandi í bland við einstaka dekkri húsmuni. Þá gefa grænar plöntur rýminu hlýlega stemningu.

Í eldhúsinu ræður einfaldleikinn ríkjum, en þar má sjá stílhreina ljósgráa innréttingu frá HTH sem tónar fallega við gegnheilt parket á gólfum. Rýmið er bjart með góðum gluggum, en þar gefur skemmtilegt hönnunarljós frá 101 Copenhagen rýminu mikinn karakter.

Frá stofunni er útgengt á 14 fm svalir til suðvesturs með snyrtilegu gler handriði og fínrásuðu lerki á gólfi.

Notalegheit í aðalhlutverki á neðri hæðinni

Gengið er niður fallegan teppalagðan stiga á neðri hæðina sem státar af fjórum svefnherbergjum og tveimur baðherbergjum. Þar af er rúmgott hjónaherbergi þar sem ró og notalegheit eru í aðalhlutverki. Fataherbergi og sérbaðherbergi eru inn af hjónaherberginu, en þaðan er einnig útgengt út í garð.

Fallegir frontar frá Haf Studio prýða innréttingar á baðherbergjunum tveimur, en þeir tóna sérlega vel við flísarnar sem eru í ljósum lit. Á öðru baðherberginu er glæsilegt frístandandi baðkar með innfelldum blöndunartækjum sem gefa rýminu mikinn lúxusbrag.

Sjá á fasteignavef mbl.is: Mosagata 18