Tónlistarmaðurinn Friðrik Ómar Hjörleifsson er að flytja úr höfuðborginni til Borgarness. Húsið sem Friðrik Ómar keypti er nýlegt og stendur á sjávarlóð með einstaklega fallegu útsýni út á Borgarfjörðinn. Ásett verð var 129,5 milljónir. 

Þegar horft er út um stóru gólfsíðu gluggana í húsinu er það eins og að horfa á málverk. Í alrýminu er eldhús með eyju, borðstofa og stofa með fallegum arni. Útisvæðið er ekki verra en þar er myndarlegur pallur. Við bjargsbrúnina er pergóla og heitur og kaldur pottur. Staðsetningin á heita pottinum minnir á sundlaugar á fimm stjörnu lúxushótelum sem virðast hvergi enda. 

Heimilið skiptir Friðrik Ómar miklu máli eins og hann greindi frá í þættinum Heimilislífi á Smartlandi. Þar sagðist hann vinna mikið heima og það verður eflaust ekki leiðinlegt í nýja húsinu í Borgarnesi. Útsýnið á líklega eftir að veita tónlistarmanninum mikinn innblástur.