Fyrirtækið Area Art hélt opnunarteiti í versluninni Akkúrat á dögunum. Um er að ræða mottur sem prýða hvert heimili. Mæðgurnar Harpa Pétursdóttir og Guðríður Friðriksdóttir stofnuðu fyrirtækið. Sjálf er Harpa lögfræðingur á BBA lögmannstofu en er þessa stundina í fæðingarorlofi og ákvað því að láta verða af því að framkvæma þennan gamla draum.
„Við mamma stofnuðum Area Art saman. Það byrjaði þannig að ég var búin að leita mér mjög lengi að mottu og fann mér svo æðislegar mottur frá þessum framleiðanda á erlendri vefsíðu sem varð til þess að ég heimsótti fyrirtækið á Spáni þegar ég var í fríi þar. Ég varð algjörlega ástfangin af gæðunum og stefnu fyrirtækisins. Svo varð úr að við fengum einkaumboð fyrir merkið á Íslandi,“ segir Harpa. Motturnar eru litríkar og gera hvert heimili að ævintýraheim.