Hljómplatan ABBA Voyage, frá sænsku hljómsveitinni ABBA mun eflaust leynast í nokkrum jólapökkum forfallinna ABBA-aðdáenda þessi jólin.
ABBA-aðdáendur, og jafnvel aðdáendur Hringadróttinssögu, geta svo tekið upp prjónana fyrir jólin og prjónað sér ABBA-jólapeysu.
Það gerðu í það minnsta Björn Ulvaeus, liðsmaður ABBA, og breski leikarinn Ian McKellen, sem þekktastur er fyrir túlkun sína á Gandálfi í Hringadróttinssöguþríleiknum og þríleiknum um Hobbitann sömuleiðis.
McKellen virðist vera mikill aðdáandi sveitarinnar en hann birti myndband af sér og Ulvaeus með prjóna í höndum, greinilega að vinna í samstæðum ABBA-peysum.