Fjölmiðlamaðurinn Frosti Logason og eiginkona hans, kokkurinn Helga Gabríela Sigurðardóttir, stofnuðu félagið Brotkast ehf. í október síðastliðnum. Félagið er stofnað utan um framleiðslu á kvikmyndum, myndböndum og sjónvarpsefni.
Frosti, sem var á hafi úti að blóðga fisk þegar mbl.is náði tali af honum símleiðis, staðfestir að félagið hafi verið stofnað utan um framleiðslu á efni, en Frosti hefur haldið úti hlaðvarpsþáttunum Ósýnilega fólkið.
Hann segir að ýmislegt sé í bígerð og á leiðinni séu fleiri þættir af Ósýnilega fólkinu, en fimm þættir fóru í loftið í febrúar og mars á þessu ári. Hann segir einnig að Brotkast muni halda utan um Harmageddon-þættina vinsælu.
Frosti hefur unnið á sjó síðustu mánuðina, en hann fór í ótímabundið leyfi frá Sýn fyrr á þessu ári.