Franska söngkonan Vanessa Paradis lét sig ekki vanta á 46th Deauville American Film Festival og var þar klædd í Chanel frá toppi til táar. Það er ekki hægt að minnast á Paradis nema minnast á smellinn Joe Le Taxi sem sló í gegn 1988 en lagið þótti mjög gott. Rödd Paradis gróf sig inn í hjörtu unglingsstúlkna sem vildu verða eins og hún. 

Nú, um 30 árum síðar, er Vanessa Paradis ennþá að gera frábæra hluti og að þessu sinni sem fulltrúi franska tískukhússins Chanel sem er í uppáhaldi hjá stórum hópi kvenna. Kjóllinn sem hún klæddist var með sérstöku sniði en í honum er lögð áhersla á mittislínuna og er kjóllinn síðari að aftan. Kjóllinn er úr Haute-Couture-línu Chanel fyrir haust/vetur 2020/21. 

Vanessa Paradis var þó ekki eina manneskjan sem var fallega klædd þetta kvöld því Zita Hanrot, sem er frönsk leikkona, klæddist líka kjól frá Chanel. Hann er úr gegnsæju efni að hluta til og vel rykktur. Hann er úr Haute-Couture-línunni fyrir haust/vetur 2020/21. 

Ef það er eitthvað sem hægt er að kalla ekta Chanel þá er það tvíhneppt með gulltölum eins og þessi kjóll sem Anne Berest rithöfundur klæddist á hátíðinni. Kjóllinn kemur í þessum beige-lit en það er líka hægt að fá hann í dökku. Kjóllinn er styttri að framan með pífum að neðan. Lögð er áhersla á mittislínuna og skartaði Berest fallegu belti frá Chanel. Skórnir og taskan koma einnig frá sama merki.