Grammy-verðlaunahátíðin fór fram í Bandaríkjunum í gærkvöldi. Vegna kórónuveirunnar fór hátíðin fram með óhefðbundnu sniði en þrátt fyrir það gátu stjörnurnar klætt sig upp í sitt fínasta púss og gengið rauða dregilinn. 

Söngkonan Dua Lipa stal senunni á rauða dreglinum í bleikum netakjól frá Versace. Kjóllinn minnir örlítið á kjól hafmeyju en hann er með hárri klauf.

Tónlistarkonan Taylor Swift vakti líka athygli en hún kom eins og vorið holdi klætt í fallegum blómakjól frá Oscar de La Renta. Hinn breski Harry Styles vakti sömuleiðis athygli en hann klæddist gulköflóttum jakka, brúnum buxum, bleiku prjónavesti og var með fjólubláan fjaðratrefil við.