Það er alltaf jafnspennandi að vita hvernig tískan verður næstu misseri. Ása Björg Tryggvadóttir markaðsstjóri Bestseller veit allt um tískuna næsta vor því hún er nýkomin heim af tískuvikunni í Kaupmannahöfn. Hún segir að litaðar gallabuxur séu að komast aftur í tísku.  

„Á tískuvikunni í Kaupmannahöfn vorum við að heimsækja okkar birgja hjá Bestseller sem koma saman í Kaupmannahöfn á þessum tíma ársins í stóru stórkostlega fallegu húsi á Bredgade í miðborg Kaupmannahafnar,“ segir Ása sem var á tískuvikunni til að kaupa inn vörur fyrir næsta ár fyrir Bestseller. Hún segir að miklir litir verði áberandi á næsta ári og miklu minna um munstur. 

„Það sem var gaman að sjá aftur voru til dæmis gallabuxur í öllum litum,“ segir Ása.

Þegar hún er spurð út í hvaða litir hafi verið mest áberandi nefnir hún afar fallegan appelsínugulan ásamt skærbleikum og að þessir tveir litir hafi verið notaðir mikið saman. 

„Það er líka fallegt að blanda þessum appelsínugula lit við bláan lit eða jafnvel jarðliti,“ segir hún og nefnir að haustið í haust verði svolítið grænt og sá litur muni halda áfram út næsta ár. 

Þegar Ása er spurð að því hvort eitthvað hafi komið á óvart nefnir hún að stutt vesti hafi verið nokkuð áberandi. 

„Nýjung sem ég er spennt að sjá eru stutt vesti sem eru voða vinsæl í Danmörku. Sum eru bara úr venjulegu efni en önnur eru vatteruð. Þau eru mjög flott yfir kjóla og skyrtur. Svo er áhugavert að sjá að allar gallabuxur eru víðar. Við hlökkum til að sjá það trend koma til baka á Íslandi,“ segir hún. 

Aðspurð um jólatískuna segir Ása að það verði mikið um pallíettur og glitrandi efni og hún geti ekki beðið eftir að fá þær sendingar í hús.