Katrín hertogaynja, ein best klædda kona heims, sló í gegn í dag þegar hún mætti í háskólaheimsókn í London í gömlum kjól úr Zöru. Katrín á það til að sjást bara einu sinni opinberlega í hverri flík og eru fötin gjarnan rándýrar merkjavörur sem fáir hafa efni á.
Katrín sást fyrst í kjólnum úr Zöru í opinberri heimsókn í Bradford ásamt eiginmanni sínum, Vilhjálmi Bretaprins, í byrjun síðasta árs. Þegar Katrín klæddist kjólnum var hann kominn á útsölu og kostaði litlar 2.500 krónur eins og Smartland greindi frá. Upphaflega kostaði kjóllinn hins vegar um 14.400 krónur.
Katrín valdi gráa pinnahæla frá Hugo Boss við kjólinn í dag en í fyrra klæddist hún svörtum skóm með þykkari hæl. Hertogaynjan var með svarta grímu í heimsókninni.