Það verður eitthvað að breytast

Katrín Ómarsdóttir skoraði fyrir KR gegn HK/Víkingi í kvöld en ...
Katrín Ómarsdóttir skoraði fyrir KR gegn HK/Víkingi í kvöld en það dugði ekki til. mbl.is/Kristinn Magnússon

„Mér fannst mikið högg að fá á okkur mark strax eftir að við skorum,“  sagði Katrín Ómarsdóttir, sem skoraði mark KR í 3:1 tapi fyrir HK/Víkingi þegar liðin mættust í 9. umferð efstu deildar kvenna í fótbolta í kvöld, Pepsi-deildinni.

KR-konur unnu fyrsta leikinn en hafa tapað hinum 8 leikjum sínum.  „Við höfum átt erfitt með að skora í sumar og ég hugsaði með mér þegar við skorum að passa nú að fá ekki á okkur mark en það klikkaði strax sem var mjög svekkjandi.   Mér fannst að þessi leikur væri svona annaðhvort eða leikur.  Mér finnst núna að við þurfum að fara í einhverja djúpa sjálfskoðun eða fá einhverja leikmenn í leikmannaglugganum.  Það verður eitthvað að breytast því átta tapleikir í röð er frekar lélegt. Þetta verður þá erfitt og lýjandi, ég næ að koma mér í gang eftir tapleik, fer þá bara í næsta leik á fullu og maður kann þetta en samt. Við vorum í svipaðri stöðu í fyrra og náðum þá að klóra í bakkann en það er öðruvísi núna,“  bætti Katrín við.

mbl.is