Silfurverðlaunin til Breiðabliks

Blikarnir Willum Þór Willumsson, Thomas Mikkelsen, Viktor Örn Margeirsson og ...
Blikarnir Willum Þór Willumsson, Thomas Mikkelsen, Viktor Örn Margeirsson og Oliver Sigurjónsson fagna þriðja marki liðsins gegn KA í dag. Willum skoraði þá sitt annað mark í leiknum. mbl.is/Eggert

Breiðablik tryggði sér silfurverðlaunin í Pepsi-deild karla í knattspyrnu 2018 á sannfærandi hátt með því að sigra KA 4:0 í lokaumferðinni á Kópavogsvellinum í dag.

Thomas Mikkelsen skoraði fyrsta markið og Willum Þór Willumsson næstu tvö, 3:0 í hálfleik. Mikkelsen innsiglaði síðan sigurinn í seinni hálfleik.

Blikar enda því mótið með 44 stig, jafnmörg og árið 2010 þegar þeir urðu Íslandsmeistarar, en Valsmenn eru hinsvegar Íslandsmeistarar 2018 með 46 stig eftir öruggan sigur á Keflavík, 4:1.

Blikar urðu að vinna 6:0 til að eiga möguleika á að vinna titilinn ef Valur gerði jafntefli við Keflavík. Þeir fengu óskabyrjun því strax á 4. mínútu var dæmd vítaspyrna á KA þegar Gísli Eyjólfsson stakk sér laglega inní vítateiginn og var felldur. Úr spyrnunni skoraði Thomas Mikkelsen af öryggi, 1:0.

Aron Bjarnason fékk dauðafæri á 9. mínútu til að koma Blikum tveimur mörkum yfir, hann fékk stungusendingu frá Gísla, slapp einn upp að KA-markinu en skaut í stöng.

KA pressaði stíft í kjölfarið og fékk einar sex hornspyrnur á 14 mínútna kafla. Eftir eina þeirra varði Gunnleifur Gunnleifsson glæsilega frá Áka Sölvasyni af stuttu færi.

Á 28. mínútu vann Aron Bjarnason boltann út við hliðarlínu, brunaði upp að endamörkum vinstra megin og renndi boltanum út í vítateiginn þar sem Willum Þór Willumsson skoraði með viðstöðulausu skoti, 2:0.

Þar með voru Blikar með öll tök á leiknum og sóttu áfram af krafti við hvert tækifæri. Á 36. mínútu fengu þeir hornspyrnu frá hægri, Mikkelsen skallaði boltann inn að markteig þar sem Willum Þór stýrði honum í netið með höfðinu, 3:0.

Aron Bjarnason komst enn einu sinni í gegn rétt fyrir hlé en Aron Elí Gíslason í KA-markinu varði vel frá honum.

Blikar voru áfram líklegri til að skora í seinni hálfleiknum og fjórða markið kom á 67. mínútu. Aron Bjarnason slapp enn laus vinstra megin í vítateig KA og renndi boltanum fyrir markið þar sem Mikkelsen kom á ferðinni og skoraði sitt annað mark, 4:0.

En þá voru vonirnar um Íslandsmeistaratitilinn löngu gufaðar upp á Kópavogsvelli, enda Valur með yfirburðastöðu gegn Keflavík á sama tíma.

KA var með fjóra af erlendu leikmönnum sínum í leikbanni í dag og þrír af þeirra yngri mönnum voru í fyrsta skipti í byrjunarliði í efstu deild.

Breiðablik 4:0 KA opna loka
90. mín. Leik lokið Silfurverðlaunin eru Blika. KA endar í 7. sæti
mbl.is