Knattspyrnumaðurinn Hans Viktor Guðmundsson hefur framlengt samning sinn við Fjölni út keppnistímabilið 2021.
Hans Viktor er uppalinn Fjölnismaður og spilaði hann með öllum yngri flokkum félagsins. Hann á 63 leiki að baki í efstu deild með Fjölni og 12 leiki með U21 árs landsliði Íslands.
Varnarmaðurinn lék 18 leiki með Fjölni á síðustu leiktíð og skoraði eitt mark. Hans Viktor gat hins vegar ekki komið í veg fyrir fall Fjölnis úr efstu deild og mun hann taka slaginn með uppeldisfélaginu í B-deildinni.