KA fær spænskan miðjumann

Iousu Villar, 32 ára spænskur miðjumaður, er kominn til liðs ...
Iousu Villar, 32 ára spænskur miðjumaður, er kominn til liðs við KA en hann lék með Ibiza í spænsku D-deildinni á síðasta tímabili. Ljósmynd/KA

Knattspyrnumaðurinn Iosu Villar er genginn til liðs við KA, en þetta kemur fram á Twitter-síðu félagsins. Villar er spænskur miðjumaður, en honum er ætlað að fylla skarð Daníels Hafsteinssonar hjá félaginu sem samdi við sænska úrvalsdeildarfélagið Helsingborg í vikunni.

Þessi 32 ára gamli leikmaður lék síðast með Ibiza í spænsku D-deildinni þar sem hann skoraði tvö mörk í 30 deildarleikjum en hann mun klára tímabið með Akureyringum. KA er í miklu basli í úrvalsdeildinni og er í fallsæti eftir fyrstu tólf umferðirnar með 12 stig.

Villar er ekki kominn með leikheimild með liðinu en hún ætti að detta inn síðar í dag. KA mætir ÍA á Greifavelli á Akureyri á sunnudaginn kemur og þarf liðið nauðsynlega á sigri að halda til þess að rífa sig af botnsvæðinu.

mbl.is