Heil umferð er á dagskrá í Pepsí Max deild karla í knattspyrnu í dag og í kvöld.
Tvö efstu liðin FH og Valur eigast við í Kaplakrika og er leikið snemma en leikurinn hefst klukkan 16:15.
Valsmenn mæta til leiks með átta stiga forystu á FH-inga, sem eiga hinsvegar einn leik til góða. Valur er með 37 stig og FH 29 stig, en þar á eftir koma Stjarnan með 24, KR og Breiðablik með 23 og Fylkir með 22 stig.
Valsmenn myndu því ná algjöru yfirburðaforskoti með sigri í dag en þá yrðu þeir ellefu stigum á undan FH-ingum. Takist FH hinsvegar að knýja fram sigur verður munurinn aðeins fimm stig og FH jafnframt með leik til góða. Liðin eiga eftir að mætast aftur og þá í lokaumferð deildarinnar.
Leikir dagsins:
KA - HK klukkan 16
KR - Grótta klukkan 16:15
FH - Valur klukkan 16:15
Fjölnir - ÍA klukkan 16:15
Breiðablik - Stjarnan 19:15
Fylkir - Víkingur R. 19:15
Þetta er tíunda umferð deildarinnar en henni var frestað í byrjun ágúst þegar gert var hlé á Íslandsmótinu vegna útbreiðslu kórónuveirunnar.
Í Lengjudeild kvenna er mikilvægur leikur á dagskrá en þá mætast Keflavík og Haukar í Reykjanesbæ klukkan 16:30. Ljóst er að annað hvort þessara liða mun fylgja Skagfirðingum upp í efstu deild að ári. Keflavík er fjórum stigum á undan Haukum fyrir leikinn í dag en liðin eiga báða innbyrðis leiki sína eftir.