Hún er frábær, þetta gerist ekki betra

„Sigrarnir verða ekki mun sætari en þetta,“ sagði Frans Elvarsson, leikmaður Keflavíkur, í samtali við mbl.is eftir að hafa skorað sigurmarkið í uppbótartíma í 2:1 sigri á Leikni úr Reykjavík í Bestu deild karla í fótbolta í Breiðholtinu í kvöld.

Frétt af mbl.is

Dramatík í Breiðholtinu

„Tilfinningin er frábær, hún gerist ekki betri. Mark á lokamínútunum, það gerist ekki betra en það. 

Mér fannst við eiga þetta skilið. Við erum búnir að fá svona mörk á okkur í undanförnum leikjum þannig það var kominn tími á að við fengum þessa tilfinningu. 

Heilt yfir var Frans nokkuð sáttur með frammistöðu síns liðs. „Við vorum meira með boltann en sköpuðum ekkert gríðarlega mikið af færum og þeir voru hættulegir í skyndisóknum. Þetta var bara bardagaleikur. Mér fannst við samt skapa fleiri hættuleg færi þannig heilt yfir áttum við sigurinn skilið í dag.“

Frans Elvarsson. Ljósmynd/Þórir Tryggvason

Ætlum að pressa á liðin fyrir ofan okkur.

Með sigrinum kemur Keflavík sér aftur upp í sjöunda sætið, aðeins þremur stigum frá KR í því sjötta. 

„Við erum þokkalega sáttir með stöðuna í töflunni í dag. Við ætlum að ýta á liðin fyrir ofan okkur og reyna að pressa á þau. 

Við eigum nokkur af þessum liðum fyrir ofan okkur i næstu leikjum þannig við ætlum bara að keyra á efstu sex sætin í næstu leikjum og enda þar þegar deildinni er skipt upp. 

Næsti leikur leggst mjög vel í mig. KR er einmitt eitt af liðunum sem við erum að reyna að pressa á. Það er alltaf gaman að mæta KR þannig ég hlakka bara mjög til þess,“ sagði Frans að lokum.

• Blogga um frétt