Topplið Vals vann í kvöld 1:0-heimasigur á Þór/KA í Bestu deild kvenna í fótbolta. Með sigrinum fóru meistararnir upp í 16 stig. Þór/KA er um miðja deild með níu stig.
Valskonur voru sterkari aðilinn í fyrri hálfleik og fengu bestu færin. Bryndís Arna Níelsdóttir skallaði hárfínt framhjá marki gestanna eftir sendingu frá Elísu Viðarsdóttur á 27. mínútu og sex mínútum síðar skaut Arna Sif Ásgrímsdóttir yfir markið úr góðu færi í teignum.
Þór/KA fékk sín færi líka. Sandra María Jessen skaut rétt yfir markið þegar hún reyndi að vippa yfir Fanneyju Ingu Birkisdóttur í marki Vals um miðjan hálfleikinn. Skömmu síðar skaut Kimberley Dóra Hjálmarsdóttir rétt framhjá af 20 metra færi.
Besta færi hálfleiksins fékk þó Valskonan Ásdís Karen Halldórsdóttir í blálok fyrri hálfleiks þegar hún náði í víti eftir baráttu við Huldu Björgu Hannesdóttur. Ásdís fór sjálf á punktinn, en Melissa Lowder í marki Þórs/KA sá við henni og sá til þess að staðan í hálfleik væri markalaus.
Valskonur héldu áfram að skapa sér færi í seinni hálfleik og Bryndís Arna skallaði rétt yfir í upphafi hálfleiksins og Ásdís Karen skaut beint á Lowder skömmu síðar.
Bandaríski markvörðurinn kom hins vegar engum vörnum við á 54. mínútu þegar Þórdís Elva Ágústsdóttir skoraði fyrsta mark leiksins með stórkostlegu skoti upp í samskeytin fjær við vítateigshornið hægra megin, eftir sendingu frá Ásdísi.
Þór/KA átti fínan kafla eftir markið, náði í nokkrar hornspyrnur og setti pressu á vörn Valsliðsins. Það vantaði hins vegar að reyna á Fanneyju Ingu Birkisdóttur í markinu og var staðan enn 1:0, þegar tíu mínútur lifðu leiks.
Leikurinn spilaðist svipað á lokakaflanum og fóru meistararnir að lokum með verðskuldaðan eins marks sigur af hólmi.
M-einkunnagjöfin og einkunn dómara verða í Morgunblaðinu í fyrramálið.