Íslenska kvennalandsliðið í fótbolta mætir Austurríki í tveimur leikjum, fyrst ytra 31. maí og á síðan á Laugardalsvelli 4. júní. Sarah Zadrazil, liðsfélagi Glódísar Perlu Viggósdóttur, er í austurríska hópnum.
Zadrazil er reyndur miðjumaður en hún lék ekki með Austurríki gegn Pólverjum og Þjóðverjum í síðasta landsliðsglugga. Zadrazil skoraði fyrsta mark Austurríkis í 3:0 sigri á Íslandi á EM 2017 og er mikill liðstyrkur fyrir leikina sem framundan eru gegn Íslandi.
Varnarmaðurinn Katharina Naschenweng, sem einnig leikur fyrir Bayern, er hinsvegar spurningamerki fyrir leikina mikilvægu en hún á við hnémeiðsli að stríða. Hægt verður þó að kalla hana inn í hópinn ef hún nær sér.
Mikil eftirvænting ríkir meðal stuðningsmanna Austurríska liðsins en þessir leikir gætu skorið úr um hvort liðið fylgi Þýskalandi beint á EM 2025 sem fram fer í Sviss. Þrjú þúsund miðar hafa þegar verið seldir en leikið verður á Innviertel vellinum í Ried, um 60 kílómetrum norðan við Salzburg.