Stórsigur á óboðlegum velli
Setja bókamerki
Íslenska kvennalandsliðið í fótbolta er skrefi nær Evrópumótinu í Englandi sem fram fer 2021, eftir 6:0-stórsigur á Lettlandi við afar krefjandi aðstæður í Liepaja í gærkvöld. Keppnisvöllurinn var svo illa farinn að hann gat vart talist boðlegur.
Ísland lýkur þar með keppnisárinu 2019 með fullt hús stiga í undanriðli sínum, eftir sigra á Lettum, Slóvökum og Ungverjum, en á nýju ári eru fyrir höndum tveir leikir við Svía sem munu ráða úrslitum um hvort liðanna endar í efsta sæti riðilsins og kemst beint á EM. Liðið sem hafnar í 2. sæti þarf að ná góðum árangri í samanburði við aðra riðla, og því gæti hvert stig og jafnvel hvert mark reynst dýrmætt.
Hin 19 ára gamla Alexandra Jóhannsdóttir lék fyrsta mótsleik sinn fyrir Ísland í gær og skoraði fyrsta landsliðsmark sitt, en hún hafði áður leikið fjóra vináttulandsleiki. Þær Hlín Eiríksdóttir, jafnaldra hennar, hafa komið sterkar inn í lið sem annars er skipað afar reyndum leikmönnum sem sumar hverjar hafa farið þrisvar sinnum í lokakeppni EM.
Nánar er fjallað um leikinn á íþróttasíðum Morgunblaðsins í dag.
