Eftir sigur Tékka á Makedóníumönnum í kvöld er ljóst að Danir eiga víst sæti í undanúrslitum Evrópumótsins í handknattleik karla. Danska liðið er nú öruggt um að hreppa annaðhvort fyrsta eða annað sæti í milliriðli tvö og eru fyrsta liðið til þess að tryggja sér sæti í undanúrslitum á þessu móti.
Danir eru með sex stig í riðlinum fyrir lokaleikina á morgun. Þjóðverjar, Spánverjar og Tékkar fjögur stig hver þjóð. Þjóðverjar og Spánverjar mætast á morgun og geta jafnað að stigum við Dani tapi þeir fyrir Makedóníu í lokaumferðinni. Eins geta Tékkar náð sex stigum leggi þeir Slóvena.
Danir geta hins vegar aldrei lent neðar en í öðru sæti í milliriðli tvö hvernig sem úrslit leikjanna þriggja í riðlinum fara í lokaumferðinni á morgun.
Komist Frakkar og Þjóðverjar til viðbótar í undanúrslit á morgun mun fjórða þjóðin vera örugg um farseðil á HM á næsta ári. Danir og Þjóðverjar verða gestgjafar mótsins og eru þar af leiðandi öruggir um keppnisrétt, Frakkar eru ríkjandi heimsmeistarar.