Frakkar tryggðu sér bronsverðlaun á Evrópumótinu í handknattleik karla en þeir sigruðu Dani í leiknum um 3. sætið, 32:29. Frakkar höfðu einnig þriggja marka forystu að loknum fyrri hálfleik, 17:14.
Danir voru skrefi á undan framan af fyrri hálfleik en um miðjan hálfleikinn náðu Frakkar forskoti og héldu því það sem eftir lifði af fyrri hálfleik.
Frakkar héldu Dönum í hæfilegri fjarlægð í seinni hálfleik en mest náðu Danir að minnka muninn í tvö mörk. Umdeilt atvik varð þó þegar nokkrar mínútur voru eftir af leik. Rasmus Lauge, leikmaður Danmerkur, skoraði að því er virtist löglegt mark eftir hraðaupphlaup.
Dómarar leiksins dæmdu skref á Lauge en í endursýningu sást að það var kolrangur dómur en hefði markið staðið hefðu Danir minnkað muninn í eitt mark. Þess í stað fóru Frakkar í sókn, skoruðu og við það virtist allur vindur úr Dönum.
Nikola Karabatic skoraði 9 mörk í liði Frakka en Hans Lindberg var markahæstur Dana með 12 mörk.