„Hversu heimskur er hægt að vera“
Danski handknattleikssérfræðingurinn Bent Nyegaard gagnrýndi þá ákvörðun Hagkaups að fresta dönskum dögum um óákveðinn tíma á samfélagsmiðlinum Twitter í dag.
Hagkaup aflýsti dönskum dögum verslunarinnar eftir tap Danmerkur gegn Frakklandi í lokaleik milliriðils I í Búdapest á Evrópumótinu sem fram fer í Ungverjalandi og Slóvakíu í gær.
Tap Dana gerði það að verkum að Ísland kemst ekki áfram í undanúrslit en Danir voru með leikinn í hendi sér þegar fimm mínútur voru til leiksloka.
„Hversu heimskur er hægt að vera,“ skrifaði Nyegaard á Twitter og vísaði þar í frétt TV2 um viðbrögð Íslendinga við tapi Dana.
Í greininni er einnig fjallað um frumvarp Björns Levís Gunnarssonar, þingmanns Pírata, þar sem hann lagði til að kóróna og merki Kristjáns Danakonungs yrði fjarlægt af Alþingishúsinu.