Brendan Rodgers knattspyrnustjóri Liverpool, og fyrrverandi stjóri Swansea, segir að boltastrákurinn frægi sem Eden Hazard sparkaði í á miðvikudaginn sé góður strákur sem elski fótbolta.
Umræddur boltastrákur, hinn 17 ára Charlie Morgan, reyndi eins og frægt er orðið að tefja leik Swansea og Chelsea í undanúrslitum deildabikarsins sem endaði með því að Hazard sparkaði í kvið hans og fékk rauða spjaldið fyrir.
„Ég þekki Charlie. Hann er góður strákur. Twitter-síðan hans er ansi mikið heimsótt þessa dagana!„ sagði Rodgers léttur við fréttamenn í dag. „Allir stjórar, leikmenn og þjálfarar hefðu viljað að boltastrákurinn þeirra gerði það sem hann gerði. Hann er mjög góður strákur og elskar fótboltann,“ sagði Rodgers.