Fabinho, miðjumaður enska knattspyrnufélagsins Liverpool, er að glíma við smávægileg meiðsli og gæti því misst af fyrsta leik Liverpool í ensku úrvalsdeildinni á þessari leiktíð en það er Liverpool Echo sem greinir frá þessu. Liverpool tekur á móti West Ham á Anfield á sunnudaginn en Fabinho fór meiddur af velli í vikunni í 3:1-sigri Liverpool á Torino í lokaleik liðsins á undirbúningstímabilinu.
Fabinho kom til Liverpool í sumar frá Monaco en enska félagið borgaði 43 milljónir punda fyrir hann. Fari svo að Fabinho, sem er að glíma við vöðvameiðsli, verði ekki klár á sunnudaginn er búist við því að Georginio Wijnaldum taki sæti hans í byrjunarliðinu en Jordan Henderson, fyrirliði Liverpool, sneri aftur til æfinga í vikunni eftir sumarfrí og er ekki kominn í leikform.