Jóhann Berg Guðmundsson og liðsfélagar hans í enska úrvalsdeildarliðinu Burnley eru óvænt úr leik í enska deildabikarnum eftir 2:1-tap fyrir C-deildarliði Burton á útivelli í dag.
Jóhann Berg spilaði allan leikinn fyrir Burnley. Kevin Long kom Burnley yfir á 40. mínútu en Liam Boyce jafnaði fyrir Burton á 62. mínútu og Jamie Allen skoraði sigurmarkið á 83. mínútu.
Englandsmeistarar Manchester City eru komnir áfram eftir þægilegan 3:0-sigur á Oxford á útivelli. Gabriel Jesus, Riyad Mahrez og Phil Foden skoruðu mörk City. Fulham er einnig komið áfram eftir 3:1-sigur á Millwall á útivelli.
Callum Wilson var hetja Bournemouth í 3:2-sigri á Blackburn. Hann skoraði sigurmarkið á fjórðu mínútu uppbótartímans. Blackpool vann svo nokkuð óvæntan 2:0-sigur á QPR og Norwich hafði betur gegn Wycombe Wanderers, 4:3.