Uli Hoeness, forseti þýska knattspyrnufélagsins Bayern München, segist hafa verið nálægt því að ráða Jürgen Klopp, knattspyrnustjóra Liverpool, til starfa árið 2008. Að lokum réði félagið hins vegar Jürgen Klinsmann í hans stað.
Klopp, sem var stjóri Mainz á þeim tíma, yfirgaf félagið stuttu seinna til að taka við stjórn Borussia Dortmund. Þar var hann við stjórn í sjö ár og gerði liðið í tvígang að Þýskalandsmeistara.
Hoeness ræddi um Klopp í samtali við Bild í Þýskalandi fyrir leik Liverpool og Bayern í Meistaradeildinni í næstu viku.
„Við ræddum saman og þetta leit vel út. Klopp var jákvæður fyrir þessu starfi. Við enduðum hins vegar á að ráða Klinsmann í staðinn. Við berum mjög mikla virðingu fyrir Klopp," sagði Hoeness.