Enska knattspyrnufélagið Arsenal á frekar að nýta krafta fyrirliðans Pierre-Emerick Aubameyang næsta vetur og missa hann svo frítt frekar en að selja hann í sumar.
Aubameyang hefur ekki viljað skrifa undir nýjan samning við félagið en hann er orðinn þrítugur og verður samningslaus í sumar. The Sun sagði frá því á dögunum að félagið væri tilbúið að selja hann fyrir meira en 20 milljónir punda en Jamie Carragher, sparkspekingur á Sky, segir Lundúnaliðið verða að halda framherjanum, sama hvað.
„Það er ekki auðvelt að finna markaskorara, ég myndi halda honum. Kannski geturðu fundið leikmenn í sumar sem munu sannfæra hann um að vera áfram eftir 12 mánuði. Ef ekki þá er hann samt besti möguleiki liðsins á að komast aftur í Meistaradeildina,“ sagði Carragher.
Aubameyang hefur skorað 61 mark í 97 leikjum fyrir félagið í öllum keppnum frá því hann kom frá Dortmund. Fyrir kórónuveirufaraldurinn vildi Arsenal fá í kringum 60 milljónir punda fyrir framherjann sem gæti reynst erfitt ef horft er til efnahagsástandsins í fótboltanum í dag.