Matteo Guendouzi, miðjumaður enska knattspyrnuliðsins Arsenal, fær ekki að mæta á æfingar hjá knattspyrnustjóranum Mikel Arteta. Frakkinn hefur farið fram á sölu frá félaginu og er ekki í náðinni hjá stjóranum.
Það er The Mirror sem segir frá þessu og kemur þar fram að Guendouzi hefur ekki mætt á æfingu með aðalliðinu í tæpar tvær vikur. Franski miðillinn L'Equipe hefur áður sagt frá því að leikmaðurinn vilji fara frá félaginu og þá gaf Arteta það í skyn á blaðamannafundi á dögunum að miðjumaðurinn ætti ekki framtíð hjá félaginu.
Miðjumaðurinn er aðeins 21 árs en hann á 82 leiki að baki fyrir Arsenal frá því að hann kom frá Lorient í heimalandinu fyrir tveimur árum. Samkvæmt frétt L'Equipe hefur Frakkinn verið settur á sölulistann hjá félaginu.