Leeds hélt sæti sínu í ensku úrvalsdeildinni í knattspyrnu í dag með því að sigra Brentford 2:1 á útivelli í lokaumferðinni á meðan Burnley tapaði 1:2 á heimavelli gegn Newcastle.
Liðin voru jöfn með 35 stig en markatala Burnley var mun betri þannig að Leeds þurfti að ná betri úrslitum í dag.
Newcastle komst yfir gegn Burnley á Turf Moor á 20. mínútu þegar Callum Wilson skoraði úr vítaspyrnu, 0:1. Á sama tíma skoraði Leeds gegn Brentford en markið var dæmt af vegna rangstöðu.
Leeds náði forystu gegn Brentford í London á 56. mínútu þegar Raphinha skoraði úr vítaspyrnu, 0:1.
Staða Burnley versnaði enn á 60. mínútu þegar Newcastle bætti við marki, 0:2. Callum Wilson var aftur á ferðinni.
Maxwel Cornet gaf Burnley von á ný á 69. mínútu þegar hann minnkaði muninn í 1:2.
Sergi Canos jafnaði fyrir Brentford gegn Leeds, 1:1, á 77. mínútu og þar með var allt í járnum á ný. Leeds með 36 stig gegn 35 hjá Burnley.
Leikmenn Brentford fengu hinsvegar rautt spjald og vegna meiðsla voru þeir aðeins með níu menn gegn ellefu hjá Leeds á lokakaflanum.
Jack Harrison skoraði fyrir Leeds í uppbótartímanum og gulltryggði liðinu áframhaldandi sæti í deildinni.
Leeds fékk því 38 stig í sautjánda sæti deildarinnar en Burnley fékk 35 stig og fellur ásamt Watford og Norwich. Jóhann Berg Guðmundsson var ekki með Burnley vegna meiðsla.