Charles Leclerc á Ferrari ók hraðast á seinni æfingu dagsins í Spielberg í Austurríki. Annar varð Valtteri Bottas á Mercedes og þriðji Pierre Gasly á Red Bull.
Max Verstappen á Red Bull klessti harkalega a öryggisvegg við lokabeygju hringsins og endaði í níunda sæti á lista yfir hröðustu hringi æfingarinnar. Mikið tjón varð á afturenda bílsins.
Vart var æfingin hafin að nýju er Bottas flaug út úr fimmtu beygju og skal á öryggisvegg með þeim afleiðingum að trjóna bílsins eyðilagðist. Þá snarsnerist bíll Vettels harkalega í lokabeygju hringsins rétt eftir óhapp Bottas en Ferraribíllinn slapp þó við vegginn.
Lewis Hamilton átti fjórða besta tímann, var 0,4 sekúndum á eftir Leclerc. Í sætum fimm til tíu urðu - í þessari röð - Carlos Sainz á McLaren, Romain Grosjean á Haas, Kimi Räikkönen á Alfa Romeo, Vettel, Verstappen og Lando Norris á McLaren sem var rétt innan við 0,9 sekúndum lengur í förum en Leclerc.