Sara Däbritz reyndist hetja þýska kvennalandsliðsins í knattspyrnu þegar liðið vann 1:0-sigur gegn Spáni í B-riðli heimsmeistaramótsins í Frakklandi á Hainaut-vellinum í Valenciennes í dag. Däbrtiz skoraði sigurmark leiksins á 42. mínútu en þýska liðið var sterkari aðilinn í leiknum.
Spánverjar voru meira með boltann en gekk illa að opna varnarmúr þýska liðsins en Däbritz nýtti sér vandræðagang í vörn spænska liðsins þegar hún kom Þjóðverjum yfir. Alexandra Popp átti fastan skalla að marki sem Sandra Panos varði í marki Spánverja.
Irena Paredes, varnarmaður Spánverja, var alltof lengi að koma boltanum í burtu og Däbritz hirti frákastið og skoraði í tómt markið. Þýskaland er með fullt hús stiga eftir fyrstu tvær umferðirnar eða 6 stig en Spánverjar eru í öðru sæti riðilsins með 3 stig.