Argentínski knattspyrnumaðurinn Lionel Messi er tekjuhæsti íþróttamaður heims samkvæmt úttekt viðskiptatímaritsins Forbes.
Á tímabilinu frá júní í fyrra til dagsins í dag þénaði Messi 127 milljónir dollara eða sem jafngildir 15,8 milljörðum króna. Þetta eru launagreiðslur ásamt auglýsingatekjum og styrktarsamningum.
Portúgalinn Cristiano Ronaldo er í öðru sæti á lista Forbes yfir 100 tekjuhæstu íþróttamenn heims en hann þénaði 109 milljónir dollara og í þriðja sæti á listanum er Brasilíumaðurinn Neymar sem þénaði 105 milljónir dollara.
Aðeins ein kona kemst á 100 efstu listann en það er bandaríska tenniskonan Serena Williams. Tekjur hennar síðasta árið voru 29 milljónir dollara og er hún í 63. sæti á tekjulistanum.
Tíu tekjuhæstu íþróttamenn heims, upphæðin í dollurum:
127 - Lionel Messi
109 - Cristiano Ronaldo
105 - Neymar
94,0 - Canelo Álvarez
93,4 - Roger Federer
89,5 - Russell Wilson
89,3 - Aaron Rodgers
89,0 - LeBron James
79,8 - Stephen Curry
65,4 - Kevin Durant