Mandzukic fær ekki að æfa með Juventus

Knattspyrnumaðurinn Mario Mandzukic, framherji Juventus, æfir ekki með liðsfélögum sínum þessa daganna og hefur enn ekki spilað leik fyrir félagið á tímabilinu en hann er sagður hafa gert munnlegt samkomulag við Manchester United um að ganga til liðs við enska félagið í janúar.

Maurizio Sarri, þjálfari Juventus, staðfesti þetta á blaðamannafundi sínum fyrir leik liðsins gegn Bologna í ítölsku A-deildinni. „Hann æfir ekki með liðinu þessa stundina vegna samkomulags sem hann hefur við félagið,“ sagði Sarri en miklar vangaveltur eru um framherjann.

Ítalski fjölmiðillinn Tuttosport greindi frá því í síðustu viku að framherjinn væri búinn að gera samkomulag við United og þá segir Sky á Ítalíu að Juventus sé tilbúið að láta hann fara í janúar.

United reyndi að kaupa leikmanninn undir lok félagsskiptagluggans í ágúst en án árangurs. „Þú þarft ekki að vera sérstaklega klár til að átta þig á því að okkur vantar framherja,“ sagði Ole Gunnar Solskjær, stjóri United, á blaðamannafundi sínum í gær fyrir leikinn gegn Liverpool á sunnudaginn. „Okkur vantar fleiri mörk í liðið en við kaupum engan nema hann sé réttur fyrir okkur.“

• Blogga um frétt