Enski sóknarmaðurinn Jadon Sancho mun fá að ráða eigin örlögum en mörg af stærstu knattspyrnufélögum heims vilja kaupa kappann frá Dortmund í sumar. Hann fer þó ekki ódýrt.
„Þú verður alltaf að bera virðingu fyrir því hvað leikmaðurinn vill,“ sagði Hans-Joachim Watzeke, framkvæmdastjóri Dortmund, í samtali við Bild. „Við höfum alltaf sagt að við viljum halda Sancho hjá okkur og ég tek það fram að ríku félögin mega ekki halda að þau fái hann á einhverju tilboðsverði frá okkur. Við þurfum ekki að selja neinn ódýrt þrátt fyrir ástandið í heiminum.“
Enska félagið Manchester United er sagt líklegasti áfangastaður Sancho í sumar en félög á borð við Real Madríd, Barcelona og Liverpool eru öll sögð hafa áhuga á honum.
Sancho hefur spilað í Þýskalandi síðan 2017 og farið á kostum með liði Dormund. Hann er einungis tvítugur að árum en á að baki 90 leiki fyrir Dortmund í öllum keppnum frá árinu 2017 þar sem hann hefur skorað 31 mark og lagt upp önnur 42.