Brasilíumaðurinn Arthur ætlar ekki að yfirgefa spænska knattspyrnufélagið Barcelona til að ganga til liðs við Juventus á Ítalíu. Talið var að félögin væru að íhuga að skipta á leikmönnum og Bosníumaðurinn Miralem Pjanic myndi fara í hina áttina.
Maurizio Sarri, þjálfari Juventus, er mikill aðdáandi Arthurs og vill ólmur styrkja miðjuna hjá liðinu. Þá voru forráðamenn Barcelona opnir fyrir skiptunum til að lækka hjá sér launakostnaðinn en Arthur er ánægður hjá Börsungum og vill hvergi fara. „Það eina sem ég hef áhuga á er að vera í Barcelona,“ sagði miðjumaðurinn við Sky Sports.
Það er því ólíklegt að Pjanic geti skipt yfir í Barcelona enda býður fjárhagstaða félagsins ekki upp á að kaupa leikmenn dýrt í sumar.
Arthur er 23 ára og hefur spilað 43 leiki fyrir Barcelona síðan hann kom til liðsins frá heimalandinu 2018. Hann hefur spilað 20 landsleiki fyrir Brasilíu. Pjanic er þrítugur sóknarsinnaður miðjumaður og hefur spilað með Juventus frá árinu 2016 en þar á undan var hann hjá Roma. Hann hefur spilað 92 landsleiki fyrir Bosníu.