Semur við Ajax til hálfs fimmta árs

Kristian Nökkvi Hlynsson, knattspyrnumaðurinn efnilegi, hefur gert nýjan samning við hollenska stórveldið Ajax til hálfs fimmta árs, eða til sumarsins 2026. Ajax staðfesti þetta á heimasíðu sinni í morgun.

Kristian, sem varð 18 ára síðasta sunnudag, hefur verið í röðum Ajax í tvö ár. Hann leikur nú sitt annað tímabil með varaliði félagsins í hollensku B-deildinni en hefur á síðustu vikum jafnframt leikið tvo fyrstu leiki sína með aðalliði Ajax, í hollensku bikarkeppninni, og skorað í þeim báðum.

Þá er Kristian kominn í íslenska 21 árs landsliðið, þrátt fyrir að vera ekki eldri, en hann lék fjóra leiki með því á síðasta ári og skoraði eitt mark. Til viðbótar á hann að baki 15 leiki með yngri landsliðunum. Kristian lék einn leik með Breiðabliki í úrvalsdeildinni árið 2019, þá aðeins 15 ára gamall.

• Blogga um frétt