Fjórir íþróttamenn fá ríkisborgararétt

Tveir leikmenn úr efstu deild karla í körfuknattleik, einn úr karladeildinni í íshokkí og einn úr næstefstu deild karla í knattspyrnu fá íslenskan ríkisborgararétt samkvæmt frumvarpi til laga um veitingu ríkisborgararéttar. 

Um er að ræða þá Danero Thomas og Collin Anthony Pryor í körfuboltanum. Báðir eru þeir giftir íslenskum konum og hafa leikið hér í mörg ár en koma frá Bandaríkjunum. Breytir þetta nokkuð stöðu þeirra í Dominos-deildinni þar sem kvóti er á fjölda bandarískra leikmanna sem verið geta inni á vellinum í einu. 

Miloslav Racansky sem verið hefur lykilmaður hjá Skautafélagi Reykjavíkur er einungis 25 ára gamall og verður nú löglegur með íslenska landsliðinu. Ætti hann að líkindum að geta styrkt landsliðið nokkuð verði hann valinn. Racansky kemur frá Tékklandi og þar hefur hann ekki leikið A-landsleik enda tékkneska landsliðið firnasterkt. 

Sá fjórði er Emir Dokara sem leikið hefur með Víkingi í Ólafsvík frá árinu 2010 og er fyrirliði liðsins. Dokara kemur upphaflega frá Bosníu.