Yfirvöld hafa biðlað til íþróttahreyfingarinnar að fresta öllum íþróttamótum og keppnum fullorðinna í tíu daga eða þar til 10. ágúst. Þetta kom fram á blaðamannafundi ríkisstjórnarinnar í Safnahúsinu í dag þar sem kynntar voru hertar aðgerðir vegna kórónuveirufaraldursins. Takmörkunin á að ná til allra iðkenda sem eru fæddir 2004 eða fyrr.
„Við biðlum til íþróttahreyfingarinnar að fresta öllum íþróttaviðburðum um eina viku, eða til 10. ágúst,“ sagði Víðir Reynisson yfirlögregluþjónn á fundinum. Einnig miðast nú fjöldatakmörkun við 100 einstaklinga auk þess sem tveggja metra reglan verður viðhöfð þar sem fólk kemur saman og í allri starfsemi.
Þessi aðgerð tekur gildi á hádegi á morgun og ljóst að hún hefur áhrif á Íslandsmótið í knattspyrnu en meðal annars áttu tvær heilar umferðir að fara fram í efstu deild karla og ein í efstu deild kvenna á þessu tímabili. Einnig átti að spila í fyrstu deildum karla og kvenna. Íslandsmótið í golfi átti einnig að byrja fimmtudaginn 6. ágúst í Mosfellsbæ. Þá átti að halda krikketmót í Hafnarfirði um næstu helgi sem sjónvarpa átti til Indlands en gert hafði verið ráð fyrir um 1,5 milljónum áhorfenda.
Uppfært 14:14: Upprunalega sagði að öllum íþróttaviðburðum yrði frestað en það eru tilmæli yfirvalda til íþróttahreyfingarinnar. Forráðamenn hjá mörgum sérsamböndunum ráða nú ráðum sínum eftir upplýsingafund almannavarna.