Ólafía Þórunn Kristinsdóttir, atvinnukylfingur úr GR, fer í kvöld af stað á fyrsta hring á LOTTE-meistaramótinu í golfi sem er hluti af LPGA-mótaröðinni og fer mótið fram á Havaí.
Ólafía á rástíma á fyrsta hring klukkan 12.28 að staðartíma, eða 22.28 að íslenskum tíma. Með henni í ráshópi eru Mina Harigae frá Bandaríkjunum og Julieta Granada frá Paragvæ.
Um er að ræða sjötta mót Ólafíu á LPGA-mótaröðinni á þessu tímabili. Hún keppti á þessu móti í fyrra og komst þá ekki í gegnum niðurskurðinn.