Woods og Mickelson mætast í Las Vegas

Tveir af bestu kylfingum allra tíma, Tiger Woods og Phil Mickelson, munu dagana 23. og 24. nóvember mætast í sjónvarpseinvígi á Shadow Creek-golfvellinum í Las Vegas. Sigurvegari einvígisins mun vinna allt verðlaunaféð sem eru litlar 9 milljónir dollara eða 963 milljónir íslenskra króna.

„Þetta er tækifæri fyrir okkur til þess að sýna fólki golf á besta tíma á tímabili þar sem það er ekki mikið að gerast í heimi golfsins,“ sagði Phil Mickelson í viðtali við ESPN.

„Þarna getum við sýnt fólki hliðar á okkur sem fólk er ekki vant að sjá með því að láta okkur vera með hljóðnema þannig að fólk getur heyrt okkur eiga samskipti.“

Þrátt fyrir að það fari vel á með þeim segir Mickelson að það sé enginn möguleiki á því að þeir muni deila verðlaunafénu:

„Ef það yrði gert þá verður þetta ekki jafnskemmtilegt. Þetta gengur allt út á að sigurvegarinn vinnur allt. Það er það sem gerir einvígið svona spennandi.“ 

Verðlaunaféð fyrir einvígið er mun hærra en gengur og gerist í golfinu og mun annar þeirra hlaupa hlæjandi í bankann eftir að keppninni lýkur. Sá sem bítur í súra eplið mun þó sennilega ekki vera á flæðiskeri staddur en á ferlum sínum hafa Woods og Mickelson unnið sér inn yfir 150 milljónir dollara í verðlaunafé.   

• Blogga um frétt