Guðrún Brá Björgvinsdóttir lék sinn annan hring á Dubbo-golfvellinum í New South Wales í Ástralíu í nótt en mótið er hluti af Evrópumótaröðinni, þeirri næststerkustu í heimi. Guðrún Brá lék hringinn á 72 höggum eða pari vallarins.
Guðrún Brá spilaði stöðugt golf allan tímann, fékk þrjá fugla á hringnum og þrjá skolla en hún stóð sig sérstaklega vel á seinni níu holunum þar sem hún fékk sjö pör og tvo fugla. Guðrún Brá er samtals á fimm höggum yfir pari eftir fyrstu tvo keppnisdagana.
Hún er í í 96.-112. sæti af 156 keppendum en það verður að teljast ólíklegt að hún muni komast í gegnum niðurskurðinn á mótinu sem mun að öllum líkindum miðast við þrjú högg yfir par en enn þá eiga einhverjir kylfingar eftir að ljúka leik, þar á meðal Valdís Þóra Jónsdóttir.