Agnar Smári Jónsson, skytta úr ÍBV, er að flytja til Reykjavíkur og mun hann ganga í raðir Vals í kjölfarið. Kristján Örn Kristjánsson, leikmaður Fjölnis, mun fylla í hans skarð. Þetta er samkvæmt heimildum mbl.is.
Agnar hefur leikið með ÍBV síðan árið 2013 og verið í lykilhlutverki í mögnuðu tímabili ÍBV til þessa. Eyjamenn eru ríkjandi deildar- og bikarmeistarar ásamt því að liðið fór alla leið í undanúrslitaleik Áskorendakeppninnar í Evrópu. ÍBV er svo 1:0 yfir í einvígi sínu gegn FH í lokaúrslitum Íslandsmótsins.
Kristján Örn Kristjánsson eða Donni, hefur verið besti leikmaður Fjölnis undanfarin ár og verið fastamaður í yngri landsliðum Íslands. Fjölnir féll úr efstu deild á leiktíðinni og því hefur hann ákveðið að róa á önnur mið.
Samkvæmt heimildum mbl.is hefur Agnar Smári áhuga á að flytja aftur til Vestmannaeyja er námi hans í Reykjavík er lokið.