Norðmenn hrósuðu sigri á fjögurra þjóða mótinu Gjensidige cup sem lauk í Ósló í kvöld.
Norðmenn höfðu betur gegn Brasilíumönnum, 30:26, í lokaleik mótsins og þeir unnu þar með alla þrjá leiki sína á mótinu. Íslendingar höfnuðu í öðru sæti með 4 stig en þeir unnu Brasilíu og Holland en töpuðu fyrir Noregi.
Línumaðurinn Bjarte Myrhol var markahæstur í liði Norðmanna með 7 mörk og stórskyttan Sander Sagosen kom næstur með 6.
Danir hituðu upp fyrir HM með tapi gegn Ungverjum á heimavelli í dag, 28:25, eftir að hafa verið átta mörkum undir eftir fyrri hálfleikinn, 16:8.
Þá gerðu lærisveinar Kristjáns Andréssonar í sænska landsliðinu jafntefli við Rússa, 29:29.