„Mér fannst þetta bara fínt, það gekk allt svona þokkalega og margt gott en líka sumt sem við gátum gert betur,“ sagði Sandra Erlingsdóttir eftir 33:24 sigur á Ísrael þegar leikið var að Ásvöllum í forkeppni um að komast á HM kvenna í handbolta.
Fyrri leikurinn var á laugardeginum og lauk með 8 marka sigri Íslands en þar sem liðin þekktu lítið hvort á annað fór kvöldið líklega í að leita að veikleikum mótherja og hvað mátti gera betur. „Mér fannst þær ísraelsku búnar að skoða okkar leik frá því á laugardaginn, voru búnar að finna út hverjir styrkleikar okkar voru en mér fannst við samt hafa betri tök á leiknum varnarlega og fyrir vikið náðum við að keyra hratt á þær en það var eitthvað stress í okkur.“
Með sigrinum er ljóst að Ísland spilar í forkeppninni um HM en ekki er ljóst hvaða lið Ísland mætir og Sandra var ekkert farin að spá í það. „Við einbeittum okkur algjörlega að þessum tveimur leikjum við Ísrael og vitum ekkert hvað gerist á næsta ári. Við náðum tveimur leikjum við Færeyjar og svo tvo leiki núna auk þess að hópurinn hefur verið saman í tvær vikur og þetta frábær tími og frábært verkefni. Það var gaman að sjá þessar ungu koma inná síðustu tíu mínúturnar og skoruðu allar, sem var mjög gaman.“