Serbía lagði Kostaríka að velli, 1:0, í fyrsta leik liðanna í E-riðli heimsmeistaramótsins í knattspyrnu í dag. Leikurinn fór fram í borginni Samara og var þetta í fyrsta sinn sem þessi tvö lönd mættust í knattspyrnuleik.
Fátt var um fína drætti framan af leik. Serbar voru sterkari aðilinn en þeim gekk illa að skapa sér afgerandi færi og ógna Keylor Navas í marki Kostaríka. Það átti þó aðeins eftir að breytast í síðari hálfleik.
Aleksandar Mitrovic átti fyrsta dauðafæri leiksins stuttu eftir hálfleik þar sem Navas tók heldur betur á honum stóra sínum og varði frábærlega.
Stuttu seinna eða á 56. mínútu var ísinn brotinn. Serbar fengu aukaspyrnu eina 25 metra frá marki og Aleksandar Kolarov smellti boltanum yfir vegginn og í hornið með hnitmiðuðu skoti með vinstri fætinum. Glæsilegt mark.
Þó mörkin hafi ekki verið fleiri voru yfirburðir Serba þó nokkrir gegn þunglamalegu og slöku liði Kostaríka. Serbía fer því á topp E-riðilsins en síðar í dag mætast hin tvö liðin; Brasilía og Sviss.